መጣጥፍ………

 

የቃል በተግባር የመጨረሻው መጀመሪያ...

እኛን ጆሮ ዳባ ብሎ በለም አፈራችንን ጉሾ ያለአንዳች ከልካይ ሲጋልብ የነበረው አባይ፤ በዛሬው ትውልድ እንዲሰማ ተነግሮት የዛሬ ዘጠኝ አመት አቤት ማለቱ ተሰምቶ ነበር። አዎ ዛሬ በኢትዮጵያውያን ታላቅ ተጋድሎ ቀድሞ ሲነገረው እንቢኝ ብሎ የእነሱን ሰምቶ ለእኛ የፀጋ እርግማን ለእነሱ ሲሳይ ሆኖ የበረሃ ገነት ያስባላቸው አባይ ግዮን ዛሬ ግና ለራሱ ዋነኛው ቦታ የት እንደሆነ አውቋል ተገታ እጅ ሰጠ። እናትም ድሩ ከየት እንደሆነ በተግባር እንዲረዱት ተደርጓል።

ያኔ የዓባይ ከቤቱ ማደር እውን ሊሆን እንደሆነ የሰሙት ኢትዮጵያውያን ቃል ገቡ። እንደሌሎቹ የአገሩ ልጆች በእሱ ለመጠቀም ማቀዳቸው ለትግበራውም መንቀሳቀስ መጀመራቸው ሰምቶ ኢትዮጵያዊ ከዳር እስከዳር ነቅሎ በመውጣት ግድቡን እውን እናደርገዋለን አሉ። የሚሊዮኖች ተስፋና ጥረት፤ የእልፎች የላብው ጤት፤ የሕዝቦች የአንድነት ማሰሮ የሆነው ታላቁ የኢትዮጵያ ህዳሴ ግድባችን በውጫዊና በብዙ ውጣውረዶች ውስጥ አልፎ እነሆ ከሰሞኑ የመጨረሻው መጀመሪያ ብስራት ተሰምቷል።

በወንዙ ብቻችንን እንጠቀም ያሉ የታችኛው ተፋሰስ ሀገራት ከግድባችን ጅማሮ አንስቶ እስከዘሬ ድረስ ለማስቆም የተቻላቸውን ሁሉ አድርገዋል። በውጭም በሀገር ውስጥም ያላቸውን አማራጭ ሁሉ በመጠቀም ለማስቆም ያላሰለሰ ጥረት አድርገዋል። ደግነቱ ቀድሞውንም ምንም ነገር ማድረግ የሚችሉት ኢትዮጵያውያን የጀመሩትን ማጠናቀቅ ልማዳቸው ነውና በብዙ ፈተና ውስጥ አልፈውም ቢሆን ዛሬ የግድቡ ሶስት አራተኛው ስራ እንደቃላቸው እውን አድርገዋል።

ወንዙን የብቻዬ ያሉቱ፣ ከእነርሱ ጋር ልቁም ስለኢትዮጵያ አይገደኝ ያሉቱ፣ ጥቅሜን እንጂ እውነት የሚሉት ነገር አላውቅም፣ ፍትህ ይሉት ነገር አይገባኝ ያሉቱ በብስራት ዜናው ከከፍታቸው ወርደዋል። የማይሆን ድካማቸው ተገልጦላቸዋል። በእነርሱ ሰፊ አሻጥርና ጋሬጣ ያልተበገሩት ኢትዮጵያውያን እንደከዚህ ቀደሙ ሰርተው በማሳየት ወደፊት በመገስገስ ላይ ይገኛሉ።

እንደኛ እውነትን የያዙና የሚገባቸውን ለማሳካት የጣሩ ሀገራት የተጋረጠባቸውን ችግር ተሻግረውበት ውል ድቅብ ብሎ ሽ ዘመናትን ተሻግረዋል። ጉባ ላይ የተጀመረው ታላቅ ዜና ነገ ተጠናቆ ዘላለማዊ ታሪክና ድል ሆኖ ስለኢትዮጵያውያን አለም ያወራል። ቆራጥነትና ትጋታቸው በስፋት ይቀባበላል። ኢትዮጵያውያንም የትጋታቸው ፍሬ ተጠናቆ ያያሉ።

ዛሬ የሰከነ የፖለቲካ ስርዓት፣ ላቅ ያለ አገራዊ መግባባት ያለው ትውልድ መፍጠር አለመቻላችን የምናገኘው ድል በልበሙሉነት እንዳናጣጥም ምክንያት ፈጥሮብናል። ዛሬ ሀገሬን ብሎ የሚሞተው ያህል ስለአገሩ ደንታ የሌለው ትውልድ መፍራቱ ሲታይ ድሉ የጎደለ ያስመስለዋል። እርግጥ ኢትዮጵያን የሚወዱ ብዙዎች እዚች ሀገር ላይ ከበቀሉ ሾተላዮች ይልቃሉና ውሎ አድሮ ርካሽ አሳባቸው መዋጥ መጨንገፉ አይቀሬነው።

ያኔ ከኢትዮጵያ ሰማይ ስር ያጠላው ከል ተገፎ፣ ደመናው ተገልጦ ሰማዩ ይጠራል። የአገሬ ሰው አገራዊ ራዕዩን ለማሳካት ሩቅ አልሞ ለህልሙ ስምረት ሲተጋ ከፊቱ የተደቀነበት ፈተና ተሻግሮ ልክ አሁን አባይ ላይ እያስመዘገበ ያለው አይነት ታላቅ ድል ደጋግሞ መሰማቱ አይቀረነው።

 

 

 

የብዙዎች አሻራ ውጤት የሆነው ታላቁ ግድባችን የሀገሪቱ ዜጎች የአንድነት ቃልኪዳን ማሰሪያ፤ የህብረታቸው ማሳያ ሀውልት ነው። የግድባችን ቀሪው ስራ ይጠናቀቅ ዘንድም ዛሬ ተቸግረንም ቢሆን ለግድባችን የምንወረውረው ጠጠር ነገ የልዕልናችን መሰረት ሆን እኛን ከኋልዮሽ እሽክርክርት አስፈጥሮን የማውጣቱ አይቀሬነት ተበስሯል። ሁሉም ኢትዮጵያዊ ለሀገሩ ለውጥ በቆመ ልክ ነው ሀገሩ ተለውጣ ማየት የሚችለው።

አሳድጋ ለወግ ማዕረግ ያበቃችውን አገሩን የካደ ከውጫዊ ጠላቶችዋ ጎን ቆሞ እስዋን ለማክሰም የሚጥሩ በልቶ ካጆች ማሳፈር የምንችለው ዛሬ ለስዋ ለውጥ በምናደርገው ብርቱ ትግል ነው። ሀገራዊ ፍቅር ዘርፈ ብዙ ችግር መፍታት የሚያስችል ቁልፍ መሳሪያ ነው።

ሀገር ካደገች ሀገራዊ ብልፅግና ማረጋገጥ ከተቻለ የሚመጡ ችሮችን አዘግይቶ የመዘጋጃ ጊዜ መሸመት፣ ጉዳቱን የመቀነስና የመቋቋም አቅም ይፈጥራል።

እንደህዳሴው ግድብ ጅምር ድል የበዙ ሀገራዊ ስኬቶች ለመቆናጠጥ ሀገር መውደድ መቅደም ይገባዋል። ሀገሩን የሚወድ ዜጋ ደግሞ ሀገሩን ለማሳደግ ያለውን ሁሉ ይሰጣል። ሀገራዊ ብልፅግና ውስጥ ሰላምን ማረጋገጥና መጠበቅ፣ የዴሞክራሲን ባህልን ማጎልበት መተግበር፣ ሀገራዊ አንድነት ማጠናከርና ማስቀጠል፣ ኢኮኖሚን በጠንካራ መሰረት ላይ ማኖር፣ ፍትህንማ ረጋገጥና ሀገራዊ ክብርን መቀዳጀት የላቀ ድልን ለማስመዝገብ ይቀላል።

      ለዚህ ሁሉ ደግሞ የዛሬው ትውልድ መንገድ መግራት ተገቢ ነው።ይህን ትውልድ የሀገር ክብርና ታላቅነት እንዲረዳ ማድረግ ይገባል።ያኔ ሁሉም ይቀላል። ከሁሉም በፊት ሀገሩን የሚያስቀድም ትውልድ ማፍራት ይገባል።ከዚያ ሀገራዊ ልማትና ለወጣቱ ምቹ ሁኔታ የሚፈጥር መደላደል ፣ ወጣቱ አልሚ ካልሆነ ወደ ጥፋት የሚያሰማራው አካል ጋር ላለመውደቁ ማረጋገጫ የለንም።ለዚህም ነው ሀገራዊ ልማት መሰረታዊ ጉዳይ የሚሆነው።

እንደ ሀገር የምናደርገው የልማት ግስጋሴ ማሳያ ደግሞ የህዳሴ ግድብ አንዱ ነው።ሀገራት የመጨረሻ ግባቸው አልመው መድረስ የሚፈልጉበት ዋነኛ መዳረሻ ራዕይ የስኬታቸው መለኪያና ማሳያቸው ህብረተሰባዊና ሀገራዊ ሁለንተናዊ ለውጥ ነው።ባንወድም ማመን የሚገባን አንድ እውነት አለ።ድሆች ነን።ድህነት ደግሞ እጅን ይጠመዝዛል፤ነፃነትን ይነሳል።መቸገር የነገን ራዕይ በሰፊው ከማለም ያሰናክላል።

እኛ አትዮጵያውያን በቂ የተፈጥሮ ሀብት ተችሮን፣ ምርታማና የሰጡትን የሚያበቅል ለም መሬት ይዘን፣ ማልማት የሚችል ለውጥን ማቀጣጠልና በአጭር ጊዜ ጥሩ እመርታን ማስመዝገብ የሚችል የሰው ኃይል እያለን ሀገራዊ የሆኑ ሀብቶችን ለይቶ ባግባቡ መጠቀም ተስኖን ለዘመናት ቆይተናል።

ይህ ታሪክ የሚያስለውጥ የዛሬ ዘጠኝ አመት የጀመርነው ታላቁ የህዳሴ ግድብ በብዙ ሀገራዊ ፍቅር ተደግፎ በውጫዊ ሀይላት ጥርስ ተነክሶበትና እውን መሆኑ ተጠልቶ ከ74 በመቶ በላይ የሆነውን የግድቡ ግንባታ ሂደት ላይ ተደርሷል። ታዲያ በዚህ ወቅት የገጠመን የኮሮና ወረርሽኝ ተፅዕኖና ስጋት የግድቡን ፍፃሜ ሂደት እንዳያዘገየው ማህበረሰባዊ ድጋፉ ተጠናክሮ መቀጠል ይኖርበታል።

የአባይ ወንዝ ለመገደብ ስንነሳ ከፊት የሚገጥሙን ከባድ ችግሮች ሳይታዩን ቀርተው ሳይሆን እሱን ተከትሎ የሚመጣው ታላቅ ለውጥ ናፍቆን ነበር። ዛሬ በተገኘው ድል እንኳን ምን ያህል የሞራል ስንቅ እንደተላበስን ማየት ችለናል። ሲያልቅ ደግሞ አስቡት ከፍ ያለስኬትና ውጤት ከዚያ አግኝተን መልማታችን ሲሰናሰል ደግሞ ዋው ዘራፍ ድህነት ደህና ሰንብት ያሰኛል።

ከዚህ ብዙ እንማራለን። ሀገራዊ እድገት በማረጋገጥ ሂደት ውስጥ ፈተና ሁሌም የሚጠበቅ ነውና ለተሻለ ስኬት ፈተናዎቹን ተቋቁሞ ማለፍ ይገባል። አዎ! ለውጥ ሁሌም አልጋ ባልጋ ሆኖ ሊመጣ አይችልም። ይልቁንም በሩጫችን መደናቀፋችን፣ በሂደታችን መሰናከላችን አይቀሬና የተለመደ ጉዳይ ነው። በፈተናው ላለመውደቅ ደግሞ ይበልጥ ማለምና ጠንክሮ መስራት የሚጠይቅ መሆኑ አያጠያይቅም።

እንደሀገር ዛሬ የገጠሙን ፈተናዎች ተቋቁመንና ተሻግረን ነገ ከዛሬና በፊት ከነበረው በተሻለ ሁለተናዊ ሀገራዊና ተቋማዊ ለውጥ ለማስመዝገብ መትጋት፣ ይበልጥ ማቀድ የተሻለ ሀገርና የሀገር አለኝታና ቤዛ የሆነ ተቋም የሚለውጡ ሀሳቦችን ማመንጨት ይኖርብናል።

ከልምዳችን ተምረናል በፈተና ውስጥ የሚመጣ ውጤት በራስ ለመቆም የሚያስችል ጠንካራ ምሰሶ ነውና በፈተናችን ውስጥ መዘንጋት የሌለብን ሀገራዊና ተቋማዊ ግብ አለ። ያ ግባችን ደግሞ ሀገራዊና ተቋማዊ ለውጥ ነው። ለዚያ ደግሞ ሀገራዊና ተቋማዊ ፍቅርን በመላበስ አብረን መትጋትና ታላቅ ሀገርና ተቋም ማድረግ የውዴታ ግዴታችን ሊሆን ይገባል።

ለዚህም በታላቁ ግድባችንና በሌሎች የሜጋ ፕሮጀክቶቻችንም ሆነ በውስጣዊ ጉዳያችን በሚገጥሙንና ሊገጥሙን በሚችሉ የፀጥታ፣ የህግ የበላይነት ጥሠትና ሉዓላዊነትን የመዳፈር ችግሮች እንደወትሮው ሁሉ ፍፁም በሆነ ህዝባዊና ሀገራዊ አለኝታነት ፀንተን በመቆም ለማክሸፍ ከመቸውም ጊዜ በላቀ አኳኃን ዝግጁ መሆን ይጠበቅ ብናል፡፡