ክብርት የመከላከያ ሚኒስትሯ የግንባታ ሥራዎችን ጎበኙ

 

 

የመከላከያ ሚኒስትር ክብርት ኢጂነር አይሻ መሀመድ በመከላከያ ኮንስትራክሽን ኢን ተርፕራይዝ በተለያዩ አካባቢዎ እየተገነቡ ያሉ ሥራዎች ጎበኙ።

በጉብኝቱ ወቅት ክብርት ሚኒስትሯ ላነሱት የተለያዩ ጥያቄዎች ሙያዊ ማብራሪያ የሰጡት የግንባታው ፕሮጀክት ሥራ አስኪያጅ ኢንጂነር አሸናፊ ሀሰን የመከላከያ መሰረተ ልማት ለሀገራችን የልማት እድገት ከፍተኛ አስተዋጽኦ እያበረከቱ ከሚገኙ ሀገር በቀል የልማት ድርጅቶች መካከል የአንበሳውን ድርሻ እየተወጣ እንደሚገኝ ገልፀው ፤ ተቋራጭ ድርጅቱ አሁን  ላይ በአዲስ አበባ ከተማ እየገነባቸው ካሉት ፕሮጅክቶች መካከል የመረጃና መረብ ደህንነት ኤጀንሲ ዋና መስሪያ ቤት አንዱ ነው ብለዋል።

ሥራ አስኪያጁ አክለውም የፕሮጀክቱ አጠቃላይ ይዘት በሦስት ደረጃዎች ተከፋፍሎ እየተከናወነ ሲሆን ህንፃው እስካሁን 514 ሚሊዮን ብር መፍጀቱንና፣ በአሁኑ ጊዜ 65 በመቶ የሚሆነው ግንባታ መከናወኑንና  ግንባታው በሚቀጥሉት ሁለት ዓመታት ውስጥ ይጠናቀቃል ተብሎ እንደታቀደ ተናግረዋል።

ህንፃው ሲጠናቀቅም ብሄራዊ ጥቅምና ሀገራዊ ደህንነትን ለማስጠበቅ በርካታ ሥራዎች የሚከናወኑበት ሲሆን በመከላከያ ኮንስትራክሽን በመገንባቱ ለመከላከያ ሠራዊቱም ሆነ ለሀገራችን የሚኖረው ፋይዳ ከፍተኛ እንደሆነ የፕሮጅክቱ ሥራ አስኪያጅ ኢንጂነር አሸናፊ  ሀሰን መግለፃቸውን ሪፖርተራችን መ/ወ/ር ፋህሚ አህመዲን ዘግቧል።

በተመሳሳይ ዜና የመከላከያ ሚኒስትር ክብርት ኢጂነር አይሻ በአፋር ክልል ዲችኦቶ ጋላፊ መገንጠያ ኤሊዳር በልሆ የሲሚኒት ኮንክሪት መንገድ ከመከላከያ ኮንስትራክሽን ኢንተርፕራይዝ ከፍተኛ የሥራ ኃላፊዎች ጋር ጎብኝተዋል። ክብርት ሚኒስትሯ በጉብኝቱ ማጠቃለያ ላይ እንደተናገሩት፤ የግንባታ ሂደቱ በጥሩ ሁኔታ ላይ ሲሆን ´ቴክኖሎጂዎችን የራስ ለማድረግ የሚደረገው ጥረት የሚበረታታና በቀጣይም ይህን አቅም ማሳደግ ይገባልª ብለዋል።

በሌላ ዜናም በመከላከያ ኮንስትራክሽን ኢንተርፕራይዝ ሚኒስትር ደኤታ አቶ ፍሰሀ ወልደሰንበት የተመራ ቡድንም በአፋርና በመቀሌ እየተካሄዱ ያሉ የመንገድና የህንፃ ግንባታዎችን ተዘዋውሮ ጎብኝቷል።

በጉብቱም ለችግሮች መፍትሄ ያስቀመጠ ሲሆን፤ በቀጣይም ፕሮጅክቶቹ በፍጥነት ተጠናቀው ለግልጋሎት እንዲበቁ መመሪያ  ተሰጥቷል። ዘገባው የበየነ በቀለ ነው።